• الرئيسية
• اخبار مصر

قال الدكتور محمد المهدي، أستاذ الطب النفسي بجامعة الأزهر الشريف، إن الطلاب بحاجة لإعادة النظر في سبب المذاكرة، مؤكدًا أن الهدف مش مجرد درجات وامتحانات، ولكن لاكتساب المعرفة وتكوين خبرات نعيش بيها ونعتمد عليها في حياتنا.

وأضاف أستاذ الطب النفسي بجامعة الأزهر الشريف، خلال حلقة برنامج "راحة نفسية"، المذاع على قناة الناس، اليوم الأربعاء: "بنذاكر عشان ننجح ونجيب درجات، وده هدف قريب ومهم، بس في هدف أبعد وأهم، وهو إننا نتعلم ونفهم ونبني عقولنا، للأسف، التعليم بقى مجرد سباق على الدرجات، ونسينا إن العلم هو اللي بيبني الأمم، وهو سبب كل حاجة حلوة حوالينا".

وأكد أن نظام الدرجات والامتحانات بالشكل الحالي عمره ما يزيد عن 200 سنة، وكان الهدف منه تقييم مدى استيعاب الطالب، لكن مع الوقت اتحول لهدف في حد ذاته، وبدأ المجتمع يضغط على الطلاب عشان يجيبوا الدرجة النهائية، ويعايرهم لو نقصوا نص درجة، وهو ما فرّغ التعليم من معناه الحقيقي.

وأوضح المهدي: "بقينا نربي أولادنا على إنهم كائنات امتحانية، هدفهم بس يحققوا الدرجات، ونسينا إن التعليم قيمته في المعلومة نفسها، في الفهم، في إن الإنسان يقدر يعيش ويفكر ويفهم اللي حواليه".

وشدد على أن المذاكرة محتاجة استراتيجيات واضحة علشان نحقق الهدفين: النجاح واكتساب العلم. وقال: "لازم نعرف ظروف الامتحانات، ونتمرن عليها، في الامتحان مفيش كتاب، يبقى لازم نذاكر ونفهم ونفتكر، نعرف نستدعي المعلومة تحت ضغط".

وأشار إلى أن الطالب اللي بيكتفي بقراءة الموضوع وفهمه، من غير ما يراجع أو يختبر نفسه، غالبًا مش هيقدر يفتكر حاجة وقت الامتحان، لأنه بيتعامل مع المذاكرة كأنها قراءة جورنال أو رواية، مش تدريب ذهني.

وتابع: "المذاكرة مش مجرد قراءة، لازم فيها تدريب على الاسترجاع، ولازم نحل أسئلة تحت ضغط زمني علشان نهيّأ نفسنا نفسياً وذهنياً للامتحانات.. التعليم مش درجات وبس، التعليم هو حياة".