• الرئيسية
• اخبار مصر

قال الشيخ خالد الجندي، عضو المجلس الأعلى للشئون الإسلامية، إن يوم عرفة له وقع شديد على الشيطان، لدرجة أنه يُعد أكثر يوم يبكي فيه، لأن ما يراه من عبادة وذُلّ وانكسار بين يدي الله في هذا اليوم، يُفقده صوابه.

وأضاف عضو المجلس الأعلى للشئون الإسلامية، خلال حلقة برنامج "لعلهم يفقهون"، المذاع على قناة "dmc"، اليوم الثلاثاء: "الشيطان في اليوم ده حالته بتبقى كرب، لعنه الله، لأنه بيشوف عباد الله واقفين على جبل عرفة، لابسين الأكفان، بيقولوا: لبيك اللهم لبيك، لبيك لا شريك لك لبيك، إن الحمد والنعمة لك والملك، لا شريك لك، دول مش ناس عادية، دول ممثلين الكون كله، دول اللي بيوزنوا الكون".

وتابع: "الشيطان اللي ما قدرش يسجد لما اتطلب منه، شايف دلوقتي ملايين بيقولوا يا رب اغفر لنا، ارحمنا، عافنا، اعفُ عنا، لا إله إلا الله، لا إله إلا الله، استغفار وتضرع وإنابة، فينفجر من الغيظ".

وأشار إلى أن إبليس في هذه الأيام، وخاصة العشر الأوائل من ذي الحجة، يشتد غيظه لأن الناس تُقبل على الله، والشيطان لا يعمل بمفرده، بل له أعوان من البشر، موضحا: "هتلاقي واحد بيشتمك على مواقع التواصل، واحد بيفتري، واحد بيكتب عليك كلام... دول رجالة إبليس، وده رزقك! آه، رزقك اللي ربنا بعته لك عشان يختبرك، ويشوفك هتغضب لنفسك؟ هترد؟ هتخسر المغفرة؟ ولا هتشتغل لحسابك الخاص!".

وشدد الجندي على أن هذه الأيام فرصة لا تُعوض، قائلاً:
"لو ربنا أكرمك وشوفت أول عشرة من ذي الحجة، فاعرف إنه بيحبك، وعايزك ترجع، اعمل إيه؟ أولًا: استغفر، ثانيًا: خلّص قلبك، إلا من أتى الله بقلب سليم، ثالثًا: أعلن العفو عن كل من ظلمك وخاض فيك".

وتابع: "العفو مش مجاني، ده عفو مدفوع الأجر، وربنا بيدفع كاش، مقدمه الدفع: المغفرة والعفو، فأوعى تتأخر، كتر من الذكر، كبّر، وهلّل، في الشارع، في بيتك، في شغلك، قول: الله أكبر الله أكبر لا إله إلا الله، ما تكسفش، الناس مش هتشفعلك، لكن ربنا هيكرمك".